Launaþróunartrygging – 1,3% hækkun á launatöflu FSS

Samkomulag fjármála- og efnahagsráðherra f.h. ríkissjóðs annars vegar og Félags starfsmanna Stjórnarráðsins hins vegar um breytingu á kjarasamningi aðila.

Þann 21. desember 2017 var skrifað undir samkomulag um útfærslu launaþróunartryggingar samkvæmt rammasamkomulagi aðila vinnumarkaðarins.
Í samkomulaginu segir að hækkun til aðildarfélaga BSRB vegna launaþróunartryggingar nemi 1,3% og hafa aðilar orðið sammála um að sú hækkun verði nýtt til hækkunar á launatöflu skv gr. 1.1.1. og skal sú hækkun taka gildi frá og með 1. janúar 2017.

Undirritað af samningsaðilum 9. febrúar 2018

FSS hefur gert samkomulag við SFR um styrki til starfsmenntunar

Síðan Starfsmenntunarsjóður BSRB var lagður niður um síðastliðin áramót hefur FSS unnið að úrlausn starfsmenntunarmála sinna félagsmanna. Þetta hefur tekið lengri tíma en vonast var til, en úrlausnin er vonandi þess virði að hafa beðið eftir henni.
FSS hefur gert samkomulag við SFR – stéttarfélag í almannaþjónustu, um að SFR sjái um að þjónusta félagsmenn FSS vegna fræðslustyrkja úr starfsmenntunarsjóði og starfsþróunarstyrkja.
2 starfsmenn SFR þær Jóhanna Þórdórsdóttir og Íris Gefnardóttir hafa fengið aðgang að félagaskrá FSS en þar eru allar upplýsingar um lengd félagsaðildar og greidd félagsgjöld. Þetta gefur félagsmönnum FSS full réttindi til styrkja úr sjóðunum frá 1. janúar 2017 miðað við starfsaldur. Einnig veita þær Jóhanna og Íris upplýsingar um sjóðina, úthlutunarreglur og annað sem félagsmenn gætu spurt um.

Sjá úthlutunarreglur og fleira undir síðunni Sjóðir

BSRB skoðar aðkomu að íbúðafélagi

Stjórn BSRB hefur nú til skoðunar hvort bandalagið muni koma að stofnun íbúðafélags ásamt Alþýðusambandi Íslands (ASÍ). Félagið mun verða leigufélag sem rekið verður án hagnaðarsjónarmiða. Það mun skýrast á næstu vikum hvort, og þá hvernig, BSRB muni taka þátt í stofnun íbúðafélagsins.

Mikil þörf segir formaður BSRB
„Þetta er mikilvægt mál sem stjórn BSRB hefur verið með til skoðunar. Við þurfum að fara vandlega yfir alla þætti málsins áður en við tökum ákvörðun um aðkomu bandalagsins að málinu, en þörfin fyrir húsnæði á viðráðanlegu verði fyrir tekjulægstu hópana ætti að vera öllum ljós,” segir Elín Björg Jónsdóttir, formaður BSRB.

Sjá nánar frétt á heimasíðu BSRB